آنکھوں کے برس پڑنے کا موسم بھی عجب ہے
حاصل مجھے تقدیر سے اک دشتِ طلب ہے

اک موجۂِ غم خوار کی خاطر لبِ دریا
سوکھے ہوۓ پیڑوں کی نظر سوۓ سبب ہے

حائل ہے مری راہ میں اک آگ کا صحرا
اس پار ہی رہ جاؤں یہ امکان بھی کب ہے

صف بستہ ہوں ہر لحظہ یہاں خود کے مقابل
دن جنگ کی تمثال ہے، شبخوں ہے کہ شب ہے

یلغار پہ آمادہ ہے پھر بادِ ستم گار
مرغانِ چمن سہمے ہیں، گل آہ بہ لب ہے

اے قہرِ اجل ساز! ترا خوف ہو کیوں کر
جینے کا بہت شوق نہ پہلے تھا نہ اب ہے