آ مری جان! مری روح کو تازہ دم کر
تھام لے مجھ کو کسی رات تو مجھ میں تھم کر

جس دھڑلے سے تری یاد چلی آتی ہے
ایسا لگتا ہے کہ رہ جاؤں گا تجھ میں رم کر

سب کو معلوم ہے پرواز ہے اک وقتی شے
تو مجھے میرا قفس یاد دلانا کم کر

اس قدر چھوڑ کے جانے پہ نہیں آتے لوگ
دل خوش فہم کو کہتا ہوں کبھی تو غم کر

اپنی خوشبو کو مرے واسطے کر بادِ بہار
اپنے سائے کو کسی روز مرا موسم کر

آخری شام ترے شہر کی کیوں ضائِع ہو
دِل اکیلا ہے بہت آج پیوں گا جم کر

نیند بھی آ گئی آخر یہ دیا گل کر دے
مجھ پہ یہ آخری احسان مرے پیتم کر